Молитва о умерших скоропостижною смертию
Неисповедимый и непостижимый в делах чуднаго и дивнаго смотрения Твоего о нас, Господи, и нестощимый в милосердии, Боже наш! Призри с высоты Святаго жилища Твоего и посети, и осени Твоею благостию мене грешнаго и недостойнаго раба Твоего, молящагося Тебе, да вседетельною и вседержительною силою Духа Твоего Святаго исправится молитва моя пред Твоим небесным мысленным жертвенником, яко кадило благовонное. Вонми гласу моления моего, Боже, Боже мой, и возлей благодатный леей утешения и крепости на слабое, скорбное и унылое сердце мое, смущающееся и стужающее о неведомом жребии, по Твоим неизследимым судьбам, внезапу похищеннаго от нас смертию раба Твоего (имя). О премилосердый Господи! Не отвержи от лица Твоего, но пощади притрепетную его душу, позванную к Твоему нелицеприятному суду в час, в онь же не чаяше. Отврати от него праведное прещение Твое, да не яростию Твоею обличиши, ниже гневом Твоим смятеши и накажеши его, но помилуй по велицей Твоей милости, помилуй ради крестных заслуг возлюбленнаго Сына Твоего, Господа Бога и Спаса нашего Иисуса Христа и молитв ради Пречистыя Его Матере и всех святых Твоих; прости ему вся согрешения, в ведении и неведении содеянная. Воззри человеколюбным оком Твоим на его веру, упование и надежду на спасительныя заслуги Единороднаго Сына Твоего, и приими душу его из матерняго лона Православныя Церкви Христовой, от земли внезапу прешедшую, приими милостию Твоею, благостию Твоею, благодатною любовию Духа Твоего Святаго, и всели ю в недрах Авраама и упокой тамо, яко сподоблявшуюся зде, в житии сем, причащатися Твоих Святых Животворящих, спасительных и безсмертных Таин. Аще же светильник ея – вера, от оскудения елея любви и благих дел угасает пред светозарным лицем Твоим, молю Тя, восполни оный, вся Исполняли, елеем благости Твоея и немерцающим светом неизреченныя любве Твоея; возжги, Отче светов и Светодавче Господи, умный ея светильник, да тако усопший во свете Твоем узрит свет и прославит Тя сердцем чистым; не затвори убо от безответнаго раба Твоего (имя) двери чертога Твоего благоукрашеннаго. Господи Боже и Отче небесе и земли! Ты не хощеши смерти грешника, но милостиво приемлеши от него и за него вся к обращению и спасению содеваемая, и Сам всяко благоустрояеши пути его, еже живу быти ему, молю Тя убо, благоволи, Владыко Господи, такожде воспомянути все дела милосердия и моления, зде на земли совершаемыя за усопшаго раба Твоего, и прияти скорбный и молитвенный вопль сердца моего, купно с молитвами о нем священнослужителей Святыя Церкви Твоея! Молю Тя, Господи, помилуй, помилуй раба Твоего, ослаби, остави ему вся прегрешения и грехопадения его, волею и неволею, разумом и неразумием содеянная; исцели многоболезненую душу его, утоли, умири и просвети смятенное и чуждою тьмою объятое сердце его, и яко алчущаго и жаждущаго Твоея милости, исполни вечных Твоих благ; яко Твое есть, еже миловати и спасати ны, Боже наш, и Тебе Единому подобает слава во веки. Аминь.
|
|
|
|
|
|
Моление о скончавшихся в клятвенных грехах
Владыко Господи Иисусе Христе Боже наш, хотяй всем человекам спастися и в разум истины приити! Прости нам прегрешения нашa; многогрешны бо есмы, окаянны и недостойны Твоея милости: Ты заповедуеши нам благословляти ненавидящих и обидящих, мы же в зложелательных словах, в сердце своем, втайне и въяве злословим, хулим, клянем ближняго, оскорбившаго нас; Ты повелевавши не клятися всяко, мы же всуе глаголем Твое Святое имя и в безумии многочастне и многообразие клянемся Тобою, клянемся небом и землею, в правде и неправде, во всякое время и во всякой вещи, и не исполняем справедливой и законной клятвы. Увы нам, Иисусе наш! Увы нам, Свете наш! Увы нам, беззаконным и окаянным! Достойны бо есмы всякаго осуждения Твоего. Но, Господи, Господи! милосерд еси Ты и человеколюбив, и милосердию Твоему несть конца! сего ради молим Тя, не осуди нас, о Премилосердый, на суде Твоем, прости нам, Иисусе, грехи наши, отпусти, Спасителю наш, беззакония нашa. Купно же молим Тя, Господи, и об усопшем (-шей) рабе Твоем (Твоей) (имя), со умилением и сокрушением сердца молим, помилуй и прости его (ю) по велицей Твоей милости, аще повинен (-на) есть согрешению сицевому. Господи! аще за всякое праздное слово, яко же писано есть, еже аще рекут человецы, воздадут о нем ответ в день судный, что убо воздаст Тебе тогда усопший (-шая), глаголавший (-шая) ближнему своему вся злая и лютая? Что убо воздаст Тебе, аще клятву преступи, или проклятие рече ближнему своему, и не разрешися от клятвы сея? Молим Тя, Господи, приими убо днесь о рабе Твоем (-ей) моление наше: да не яростию Твоею обличиши его (ю) тогда, ниже гневом Твоим накажеши его вконец, но, по благости Твоей, прости ему (ей) согрешения сия, свободи от клятвы сея, яко от уз адовых; прости и разреши всяку клятву напрасну, тщетну и ложну, еюже аще кляся усопший (-шая) пред Тобою и пред человеки, волею или неволею, нуждею или произволением, и аще кляся и Тобою, и небом, и землею, и очима своима, и смертию своею, и не исполни клятву свою, ниже покаяся пред Тобою в клятвопреступлении сем, молим Тя, Господи, разреши ему (ей) клятву сию, еюже связа себе, яко путами железными, или аще под клятвою священническою или родительскою бысть и не возможе разрешитися от клятвы сея, зане отъиде к Тебе в день и час, егоже не веде: того убо ради паки молим Тя, Господи Боже наш, яко всех долгов наших Решителя, грешных Спасителя: Сам убо разреши клятву сию, молим Тя, о дражайший Искупителю наш, Святым Твоим именем молим, разреши узы сии, яже суть крепчайше пут железны, Ты бо еси Бог наш, сошедый во ад и узы окованных разрешивый, Сам разреши и душу раба Твоего (рабы Твоея); яви безпредельную милость Твою и щедроты Твоя грешному (-ой), чающему (-щей) в Тебе Едином спасения, прощения и оставления грехов, и избави его (ю) от вечныя смерти Своею крестною смертию и славным воскресением Твоим; приведи его (ю), Сладчайший Иисусе, от тьмы к свету, от смерти в живот, и тако да прославит Пресвятое имя Твое со Отцем и Святым Духом Твоим в безконечные веки. Аминь.
|
|
|
|
|
|
Заключительная молитва
Дата добавления: 2018-11-24; просмотров: 184; Мы поможем в написании вашей работы! |
Мы поможем в написании ваших работ!