На стиховне стихиры воскресны.
Слава, глас 6:
Исповедницы веры и священномученицы страны нашея, / кровьми вашими землю обагрили есте, / ныне же, предстояще Престолу Божию, // присно молите Господа спастися душам нашим.
И ныне, Богородичен:
Творец и Избавитель мой, Пречистая, / Христос Господь, из Твоих ложесн прошед, / в мя оболкийся, первыя клятвы Адама свободи. / Темже Ти, Всечистая, / яко Божии Матери же и Деве, / воистину вопием немолчно: / радуйся, Ангельски, радуйся, Владычице, / Предстательство и Покрове, // и Спасение душ наших.
На благословении хлебов: Богородице Дево (дважды) и новомучеников.
Тропарь, глас 4:
Святии новомученицы земли Белорусския, / благочестия светильницы и жития евангельскаго образи, / заточения, изгнания и горькия работы мужественне претерпевшии / и Христа ради даже до крове пострадавшии, / Егоже, яко Начальника мира и спасения Совершителя, / усердно ныне молите // помиловати души наша.
НА УТРЕНИ
На Бог Господь: тропарь воскресный (дважды).
Слава: тропарь новомучеников; и ныне:
Богородичен воскресный по гласу Славы.
По стихословии: седальны Октоиха.
Величание:
Величаем вас, / святии новомученицы и исповедницы земли Белорусския, / и чтим честная страдания ваша, / яже за Христа во утверждение веры Православныя // претерпели есте.
Псалом избранный: Услышите сия, вси языцы, / внушите, вси живущии по вселенней:
По полиелеи ипакои гласа.
|
|
Седален, глас 4:
Возсияли есте светло, яко звезды небесныя, / деянии и учении вашими, светоноснии новомученицы, / и облистали есте землю Белорусскую.
Седален, глас 5:
Апостольским вещанием огласивше ваш ум, / жертву чисту принесосте Царю и Творцу, / воплощшемуся нас ради от Девы Богородицы и воскресшему со славою, / Егоже пред мучители исповедасте, священномученицы.
Слава, глас 1:
Церковь Православную, яко стражи неусыпнии, охраняете присно / и верныя ограждаете, мученицы божественнии, Христови воини.
И ныне, Еогородичен:
Воистину Богородицу Тя вемы, / яко Заступницу земли Белорусския и Молитвенницу присную о священницех ея, / Ты бо сущих в бедах, гонениях и узах Покровом Божественным всемощно хранила еси.
Канон воскресный со ирмосом на 4, Богородицы на 2 и новомучеников.
Канон новомучеников на 8, глас 4: Песнь 1
Ирмос: Моря чермную пучину / невлажными стопами / древний пешеьиествовав Израиль, / крестообразныма Моисеовыма рукама // Ама- ликову силу в пустыни победил есть.
Припев: Святии новомученицы и исповедницы земли Белорусския, / молите Бога о нас.
Закон Божий зело возлюбив, отче Владимире, / добре слепым детем его преподал еси, / укрепляя в них дух смирения и бодрости. / Помози и нам претерпети вся напасти мира сего.
|
|
Истины веры Православныя возвещаяй учеником вертограда духовнаго, / сам, яко знамя победное, пронесл еси я чрез житие твое, священномучениче Василие.
Прием священный сан в годину тяжких испытаний, / последи же, крепость во искушении явив, / смерть от гонителей претерпел еси, отче Петре, священномучениче.
Богородичен: Богомати Пречистая, / милостива сотвори нам Сына Твоего, / из Тебе неизреченно воплотившагося на спасение наше, / Тя бо Предстательницу и Спасение стяжахом.
Песнь 3
Ирмос: Веселится о Тебе Церковь Твоя, Христе, зовущи: / Ты моя крепость, Господи, // и прибежище, и утверждение.
В вере укрепляя паству твою, отче Валериане, / заповеди Христовы соблюл еси даже до смерти.
Небоязненно стал еси на защиту веры Православныя, священне Владимире, / и, не устрашився сильных мира сего, / исповедал еси истину Божию даже до крове.
Искренне служа Богу, священномучениче Иоанне, / веру истинную соблюл еси, / неповинно прием смерть от нечестивых.
Богородичен: Песньми похвальными воспоим, вернии, Пресвятую Владычицу, / Марию Богоневестную, Покров Божественный, / тихое Пристанище, всех верных Предстательницу.
|
|
Кондак, глас 8:
Новомученицы и исповедницы земли нашея, / в тяжких испытаниих даже до смерти любовь к Богу сохраньше, / правило веры и образ благочестия нам явили есте. / Сего ради, ныне в Небесных обителех ликующе, // молите Христа Бога, да спасет души наша.
Седален, глас 3:
Божественную благодать, немощная врачующи и оскудевающая восполняющи, приемше, / яко агнцы чистии, Христу Пастыреначальнику последовали есте, мученицы всехвальнии, / и, страдания мужественне претерпевше, венцы Небесныя стяжали есте. / Темже любовию святую память вашу светло торжествуем.
Слава, и ныне, Богородичен:
Не имамы инаго прибежища, разве Тебе, Богородице, / страны нашея Заступнице усердная, / всяк бо, почитаяй Тя, надежду обретает.
Песнь 4
Ирмос: Вознесена Тя видевши Церковь на Кресте, / Солнце Праведное, / ста в чине своем, / достойно взывающи: // слава силе Твоей, Господи.
Неленостно Господеви служа, / ревностно окормлял еси паству твою, отче Сергие, / темже мученически за Христа пострадал еси.
Видя врага злохитростнаго, на Церковь Христову ополчившагося, / ревностне призывал еси паству твою хранити благочестие и веру Православную, отче Владимире. / Сего ради в Небесных чертозех ныне упокоеваешися.
|
|
В субботу преблагословенную Христу спострадал еси, священномучениче Михайле, / избиение от иудея беззаконнаго невинно претерпев. / Ныне же в Царствии Небеснем с воскресшим Господем присно субботствуеши.
Богородичен: Умерщвлена древле Адама, Пречистая, / паки возвела еси к жизни, / Ипостасную Жизнь рождши, Христа, / Емуже приразйвшися, расторжеся яве враждебнейшая смерть.
Песнь 5
Ирмос: Ты, Господи, мой Свет, / в мир пришел еси, / Свет Святый, обращаяй из мрачна неведения // верою воспевающия Тя.
Пастырю Доброму последуя, / положил еси душу твою за овцы словесныя, отче Порфирие. / Темже моли о нас Господа славы, / да твердо сохраним веру Православную во вся дни жизни нашея.
Диаконскаго чина удостоився, отче Николае, / первомученику архидиакону Стефану уподобился еси, власти безбожныя обличая, / и, якоже той, смерть за Христа приял еси.
Богу и ближним неленостно послужил еси, отче Михаиле, / сего ради беззаконными убиваемь, / с молитвою на устех дух твой Христу предал еси. / Ныне с праведными на лоне Авраамли почиваеши.
Богородичен: Яко утро, Богомати, возсияла еси, / Истинное Солнце Правды, Христа Бога нашего, на руку носящи, / тем Тя вси прославляем.
Песнь 6
Ирмос: Пожру Ти со гласом хваления, Господи, / Церковь вопиет Ти, / от бесовския крове очищшися / ради милости от ребр Твоих // истекшею Кровию.
Дерзновенно пред мучители веру во Христа Иисуса, яко истиннаго Бога, исповедав, / Того ради даже до смерти пострадал еси, священномучениче Николае.
Пастырское служение в Слуцких пределех добре совершая / и ревностию по Бозе распалаяся, / верныя небоязненно исповедати веру во Спасителя призывал еси / и смерть мужественне сретил еси, отче Иоанне.
Залог веры, якоже обещався, сохранил еси / и мученическою смертию запечатлел еси, священне Димитрие. / Сего ради земли Белорусская и Тверская достойно тя величают.
Богородичен: Душ наших очищение / и спасения Ходатаица явилася еси, Пресвятая Дево, / темже Тя верою и любовию православно величаем.
Кондак и икос воскресные.
Песнь 7
Ирмос: В пещи авраамстии отроцы персидстей, / любовию благочестия паче, / нежели пламенем, опаляеми, взываху: // благословен еси в храме славы Твоея, Господи.
В годину гонений окормлял еси люди отчаянныя, / словом Божиим тыя укрепляя, отче Иоанне. / Темже, яко пастырь истинный Церкве Христовы, / мученически пострадал еси.
Терпя страдания, / не отреклся еси от веры Христовы, отче Леониде, / обаче даже до смерти верен Господеви пребыл еси.
Милостив пастырь и усерден молитвенник явился еси, отче Александре, / сего ради и за веру Христову убиение приял еси.
Богородичен: Моли присно Сына Твоего и Бога нашего, Неискусобрачная Марие Чистая, / низпослати нам велию милость.
Песнь 8
Ирмос: Руце распростер, Даниил / львов зияния в рове затче; / огненную же силу угасиша, / добродетелию препоясавшеся, / благочестия рачители отроцы, взывающе: // благословите, вся дела Господня, Господа.
Доблемудренне паству твою окормляя, священномучениче Владимире, / совесть чисту и неврежденну соблюл еси / и смерть от безбожных, Бога прославляя, приял еси.
От житий святых житию богоугодному научаяйся, отче Димитрие, / якоже оныя, и смерть за Христа претерпел еси.
Егда гонения на Церковь святую умножишася, / сан священный со дерзновением приял еси, отче Петре, / темже и в жертву благоприятну Богови принеслся еси.
Богородичен: Безсеменно зачала еси, Богоневесто, Спаса и Господа, / избавляющаго от тли воистинну песнословящия Тя.
Песнь 9
Ирмос: Камень нерукосечный / от несекомыя горы, Тебе, Дево, / краеугольный отсечеся, Христос, / совокупивый разстоящаяся естества. // Тем, веселящеся, Тя, Богородице, величаем.
Первый списатель житий пастырей земли Белорусския, / в годину гонения пострадавших, явился еси, отче Серафиме, / и послежде сам живот твой за веру и други твоя положил еси.
Издетстка нищету и лишения претерпевая, отче Матфее, / милосердию и состраданию навыкл еси. / Темже, на высоту священства восшед, / ревностно послужил еси приходящим к тебе / и мученическаго венца сподобился еси.
Новомученицы и исповедницы земли Белорусския, / молите о нас Святую Троицу, / да и мы посреде искушений и бед / сохраним веру Православную во вся дни живота нашего.
Богородичен: Бога, Егоже родила еси, Чистая Дево, / Сего умоли рабом Твоим даровати покаяние / и согрешений прощение.
Свят Господь Бог наш: Светилен воскресен.
Слава:
Яко священномученицы и исповедницы вернии, / явистеся в земли Белорусстей, пастырие добрии, / и, испивше чашу страданий, благоугодисте Христу. / Темже, во Свете ныне водворяющеся, / молитеся с небесными силами о всех нас.
И ныне: Богородичен воскресен.
На хвалитех стихиры воскресны на 4 и новомучеников на 4.
Глас 8:
Благодатию священства свыше облекшеся, / пастырие добрии показастеся, / и, кротость и терпение стяжавше, / любовь ко Христу во страданиих сохранили есте; / темже молим вас, священномученицы земли нашея, / испросите у Господа, / да, тихое и безмолвное житие поживше / во всяком благочестии и чистоте, // спасем души наша. (Дважды.)
Стих: Воспойте Господеви песнь нову, / воспойте Господеви вся земля.
Имуще вы пастыри неусыпныя в молитвах, / просим вас, страдальцы Христовы, / утвердите единство Церкве нашея, / угасите шатания языческая, / испросите у Господа Вседержителя / даровати земли нашей благоденствие, / да, тихое и безмолвное житие поживше / во всяком благочестии и чистоте, // обрящем велию милость.
Стих: Священницы Твои облекутся в правду / и преподобнии Твои возрадуются.
Чтуще вы, яко священномученицы земли Белорусския, / усердно просим, / испросите у Господа нам, в скорбех и печалех пребывающим, / терпение добропобедное и любовь нелицемерную, / да, тихое и безмолвное житие поживше / во всяком благочестии и чистоте, // спасем души наша.
Слава: стихира Евангельская.
И ныне: Преблагословенна еси:
НА ЛИТУРГИИ
Блаженны гласа на 6 и новомучеников, песнь 3-я, на 4.
По входе:
В Господском храме:
тропарь воскресный, тропарь новомучеников;
Слава: кондак новомучеников, и ныне: кондак воскресный.
В Богородичном храме:
тропарь воскресный, храма, новомучеников; кондак воскресный,
Слава: кондак новомучеников, и ныне: кондак храма.
В храме святого:
тропарь воскресный, тропарь новомучеников; кондак воскресный,
Слава: кондак новомучеников, и ныне: Предстательство христиан:
Прокимен дне и новомучеников, глас 7: Бог нам Прибежище / и Сила.
Стих: Помощник в скорбех, обретших ны зело.
Апостол дне и новомучеников: к Римляном, зачало 99.
Евангелие дне и новомучеников: от Луки, зачало 105-106.
Конец: В терпении вашем стяжите душа ваша.
Причастен дне и новомучеников: Радуйтеся, праведнии о Господе:
Молитва
О, избранницы и угодницы Христовы, новомученицы Церкве нашея, столпи непоколебимии, земли Белорусския благое прозябение и краснии плоды, сродников ваших предстателие и наставницы!
Вы во время гонения безбожнаго от сокровищниц душ ваших спасительное исповедание Православныя веры изнесли есте и людем верным пастырие добрии явилися есте, души ваша за Христа и Его овцы полагающе и лютыя волки далече отгоняюще.
Ныне убо призрите на нас, недостойных чад ваших, умиленною душею и сокрушенным сердцем вас призывающих. Умолите Господа Бога, да простит согрешения наша и избавит от адовых уз и вечнаго мучения. Утвердите нас в вере святей, научите нас присно творити волю Божию и хранити заповеди церковныя. Будите пастырем нашим — правило веры, воином — вожди духовнии, болящим — врачи изряднии, печальным — утешителие, гонимым — заступницы, юным — наставницы, всем же — благосердии отцы и теплии молитвенницы, яко да молитвами вашими соблюдется в Православии страна наша и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.
Дата добавления: 2022-12-03; просмотров: 69; Мы поможем в написании вашей работы! |
Мы поможем в написании ваших работ!