Кондак Собора новомучеников и исповедников земли Белорусския, глас 8
Новомученицы и исповедницы земли нашея, / в тяжких испытаниих даже до смерти любовь к Богу сохраньше, / правило веры и образ благочестия нам явили есте. / Сего ради, ныне в Небесных обителех ликующе, // молите Христа Бога, да спасет души наша.
Величание
Величаем вас, / святии новомученицы и исповедницы земли Белорусския, / и чтим честная страдания ваша, / яже за Христа во утверждение веры Православныя // претерпели есте.
Месяца октября в 15-й день
Служба собора новомучеников и исповедников земли Белорусския
НА ВЕЛИЦЕЙ ВЕЧЕРНИ
Блажен муж: кафисма вся. На Господи, воззвах: стихиры Октоиха на 4 и новомучеников на 6.
Глас 4:
Священномученицы земли Белорусския, / яко пастырие добрии, / мудре словесныя овцы окормляли есте, / веру Православную утверждающе, / нищия одевающе и алчущия питающе, / страждущия врачующе и закон любве Божия соблюдающе. / Сего ради молим вы: / молите Христа Бога, // да спасет души наша. (Дважды.)
Священномученицы земли Белорусския, / Пастыреначальнику Христу последующе, / веру истинную, яко щит, сохранили есте / и, с любовию ближним послуживше, / даже до крове пострадали есте. / Темже и неувядаемый венец безсмертия обрели есте / и ныне молите Господа // о спасении душ наших. (Дважды.)
Новомученицы и исповедницы земли Белорусския, / предстояще Престолу Святыя Троицы, / присно молитеся за нас, на земли сущих, / да ревностно храним заповеди Божия, / и явим терпение во всех обстояниих, / и любовь нелицемерную обрящем, // и спасем души наша. (Дважды.)
|
|
|
Слава, глас 5:
Всевышний Владыко, / в Троице славимый и покланяемый, / ущедри ны благоприятными мольбами / священномученик Твоих, / пред мучители дерзновенно исповедавших Тя, / Единаго истиннаго Бога, / и Твое, Сыне Божий, / неизреченное от Матере Девы // спасительное воплощение.
И ныне: догматик гласа. Вход. Прокимен дне. И чтения 3 новомучеников.
Деяний святых апостол чтение (глава 4):
В тыя дни собрашася во Иерусалим князи, старцы, книжницы / и елицы беша от рода архиереиска. / И, поставльше Петра и Иоанна посреде, вопрошаху: / коею силою или коим именем исцелиста хромаго? / Петр, исполнився Духа Свята, рече: / князи людстии и старцы Израилевы, / аще мы днесь истязуеми есмы о благодеянии человека немощна, / о чесом сей спасеся, / разумно буди всем вам и всем людем Израилевым, / яко во имя Иисуса Христа Назорея, / Егоже вы распясте, / Егоже Бог воскреси от мертвых, / о Сем сей стоит пред вами здрав. / Сей есть камень, укоренный от вас, зиждущих, / бывый во главу угла, / и несть ни о единем же инем спасения; / несть бо иного имене под небесем, даннаго в человецех, / о немже подобает спастися нам. / Видяще же Петрово дерзновение и Иоанново и разумевше, / яко человека некнижна еста и проста, дивляхуся, / знаху же их, яко со Иисусом беста; / видяще же исцелевшаго человека с нима стояща, / ничтоже имяху противу рещи. / Повелевше же има вон из сонмища изыти, / стязахуся друг со другом, глаголюще: / что сотворим человекома сима? / Яко убо нарочитое знамение бысть има, / всем живущим во Иерусалиме яве, / и не можем отврещися; / но да не более прострется в людех, / прещением да запретам има ктому не глаголати о имени сем ни единому от человек. / И призвавше их, / заповедаша има отнюд не провещавати, ниже учити о имени Иисусове. / Петр же и Иоанн, отвещавше к ним, реста: / аще праведно есть пред Богом / вас послушати паче, нежели Бога? / Судите: не можем бо мы, яже видехом и слышахом, не глаголати. / Они же, призапрещше има, пустиша я, / ничтоже обретше, како мучити их, людий ради, / яко вси прославляху Бога о бывшем: / лет бо бяше множае четыредесяти человек той, / на немже бысть чудо сие исцеления. / Отпущена же бывша, приидоста ко своим и возвестиста, / елика к нима архиереи и старцы реша. / Они же, слышавше, единодушно воздвигоша глас к Богу и рекоша: / Владыко, Ты, Боже, сотворивый небо и землю и море и вся, яже в них, / Иже Духом Святым усты отца нашего Давида, отрока Твоего, рекл еси: / вскую шаташася языцы и людие поучишася тщетным? / Предсташа царие земстии, / и князи собрашася вкупе на Господа и на Христа Его. / Собрашася бо воистину во граде сем на святаго Отрока Твоего Иисуса, / Егоже помазал еси, / Ирод же и Понтииский Пилат, с языки и людьми израилевыми, / сотворити, елика рука Твоя и совет Твой преднарече быти. / И ныне, Господи, призри на прещения их / и даждь рабом Твоим со всяким дерзновением глаголати слово Твое, / внегда руку Твою прострети Ти во исцеления, / и знамением и чудесем бывати, именем святым Отрока Твоего Иисуса. / И помолившимся им, подвижеся место, идеже бяху собрани, / и исполнишася вси Духа Свята, / и глаголаху слово Божие со дерзновением.
|
|
|
|
|
|
К Тимофею послания святаго апостола Павла чтение (глава 4):
Чадо Тимофее, / засвидетельствую убо аз пред Богом и Господем нашим Иисус Христом, / хотящим судити живым и мертвым в явлении Его и царствии Его: / проповедуй слово, / настой благовремение и безвременне, / обличи, запрети, умоли со всяким долготерпением и учением. / Будет бо время, егда здраваго учения не послушают, / но по своих похотех изберут себе учители, чешеми слухом, / и от истины слух отвратят, и к баснем уклонятся. / Ты же трезвися о всем, злопостражди, / дело сотвори благовестника, / служение твое известно сотвори. / Аз бо уже жрен бываю, / и время моего отшествия наста. / Подвигом добрым подвизахся, / течение скончах, веру соблюдох. / Прочее убо соблюдается мне венец правды, / егоже воздаст ми Господь в день он, праведный Судия, / не токмо же мне, но и всем возлюбльшим явление Его.
|
|
|
Ко Евреем послания святаго апостола Павла чтение (глава 11):
Братие, / иже верою победиша царствия, / содеяша правду, получиша обетования, / заградиша уста львов, / угасиша силу огненную, / избегоша острея меча, / возмогоша от немощи, / быша крепцы во бранех, / обратиша в бегство полки чуждих. / Прияша жены от воскресения мертвых своих. / Инии же избиени быша, не приемше избавления, / да лучшее воскресение улучат. / Друзии же руганием и ранами искушение прияша, / еще же и уз и темниц. / Камением побиени быша, / претрени быша, искушени быша, / убииством меча умроша, / проидоша в милотех и в козиях кожах, / лишени, скорбяще, озлоблени. / Ихже не бе достоин весь мир, / в пустынях скитающеся, и в горах, и в вертепах, и в пропастех земных. / И сии вси, послушествовани бывше верою, не прияша обетования, / Богу лучшее что о нас предзревшу, / да не без нас совершенство приимут.
На литии стихира храма и новомучеников.
Глас 5:
Страстотерпцы славнии, / веру Православную добре сохраныне, / в мучениих, бедах и напастех, / яко столпи незыблемии, пребысте / и образ благочестия верным преподаете. / Темже и нам помозите / веру непоколебиму соблюсти // и спасти души наша.
Имуще вас, новомученицы доблии, / теплыя ходатаи ко Господу / и твердыя поборники веры Православныя, / молим вас мы, недостойнии, / жизнь нашу умирити, / терпение и любовь к ближним даровати // и спастися душам нашим.
Слава, глас тойже:
Новомученицы Белорусстии, / кровию вашею веру Христову запечатлевшии, / Владыку всех молите / Церковь Русскую в Православии утвердити, / землю нашу от скверн очистити, / люди во благочестии сохранити // и спастися душам нашим.
И ныне, Еогородичен:
Храм и дверь еси, / палата и престол Царев, / Дево Всечестная, / Еюже Избавитель мой, Христос Господь, / во тьме спящим явися, / Солнце сый Правды, просветити хотя, / яже созда по образу Своему рукою Своею. / Темже, Всепетая, / яко матерне дерзновение к Нему стяжавшая, // непрестанно моли спастися душам нашим.
Дата добавления: 2022-12-03; просмотров: 26; Мы поможем в написании вашей работы! |
Мы поможем в написании ваших работ!